¡Viva a Retranca!

CHANCHONADA 274º

¡Viva a Retranca!.

A Retranca é unha forma moi especial do humor que temos os galegos, a cuestión é darlle a volta a realidade e olla-lo seu lado absurdo, é tentar facerlle ver á parte contraria que ese lado absurdo é o máis práctico para a realidade, así dende ese lado absurdo rirnos da realidade. Resulta dificil entender esta explicación, pero imos cun exemplo:

• Pepe, hai uns mozos da aldea que están a pedir unha axuda para facer unha piscina; ¿qué lles dou?
• ¡Dálles uns caldeiros con agua para que a vaian enchendo!

A mediados do mes pasado, era un mércores 11 de Xuño, despois de rematar unhas xestións de traballo en Santiago de Compostela, xunto a outros compañeiros de traballo tomamos a decisión de ir a tomar unhas cervexas polo casco vello da cidade. Ou sexa, o normal, o que fan miles de españolitos ó remata-la xornada laboral.

A nosa sorpresa foi atopar cunha manifestación na Praza do Toural (celebre e coñecida praza de Compostela), os manifestantes exercian o seu dereito de manifestación e proclamaban o seu apoio á “Declaración de Froilán I, como Rei da Galiza”. Moito nos rimos, brindamos polo novo pretendente ó trono do Reino da Galiza,... dende logo foi a manifestación máis retranqueira que temos visto en moitos anos. Dende logo, os galegos somos especialistas en rirnos de nos mesmos; ben algúns amargados están doidos que en América fagan chistes sobre galegos; pero resulta que a inmensa maioría dos descendentes de criollos, son descendentes de galegos.

A concentración estaba convocada por “consenso de distintos colectivos, partidos, sindicatos e outras organización retranqueiras de bases sociais”. Dada a longa tradición histórica da Galiza como reino, primeiro como Reino Suevo trala desaparición do Imperio Romano de Occidente, logo como parte integrante do Reino Visigodo, logo como Reino cristiano durante a reconquista, como Reino integrante da Coroa de León, como o Reino que deu orixen a Portugal,.... os alí concentrados reclamaban o dereito do Sr. Felipe Juan Froilán de Todos los Santos de Marichalar y Borbón a ocupa-lo trono do Reino da Galiza.

Os manifestantes reclamaban a convocatoria dun referendo, para consultar ó pobo galego se queremos apandar cunha nova reinstauración da Monarquia Galega na figura de Froilan I; ou seguir achantando e soportando cós deputados xunteiros e os deputeiros da Deputacións... Alí estaban os manifestantes ben traxeados ó xeito tradicional; por momentos non sabía se estaba no día do desfile do Sábado das Festas do Monte, ou se aquilo era unha broma de cámara oculta dun programa da Televisión de Galicia; xentes que falaban esa variante do galego e do español denominada “castrapo”, un idioma que xa case está esquecido i en vías de extinción. Ondeaban ó vento as bandeiras do Reino Suevo (fondo marelo con un dragón verde enfrentado, a un león un de cor vermella).

Os manifestantes, tamén reclamaban a anexión das rexiósn portuguesas do Alto Minho, de Tras os Montes, do Bierzo, e do occidente asturian e zamorán,...

Temos que recoñece-la nosa ignorancia, descoñeciamos a existencia de tal bandeira do Reino Suevo da Galiza; dende un punto de vista estético dende logo é máis vistosa que a actual. Claro que para bandeiras, propostas de formación política de Galicia, de España, da Unión Ibérica,... aquí cada un ten a súa proposta; en plan cachondeo, o noso compañeiro hispano-ruso-ucraniano, él por formación académica, por tradición familiar e tamén por nostalxia da URSS, apoia a creación da NURSE (Nación Unida de Repúblicas Soviéticas Españolas).

Xa todos sabemos, que para gustos hai moitas cores; para cores hai moitas frores, i en cuestións de frores sobran moitos capullos, i cada tonto ten a súa tonteria, a cal é moi soberana i respetable. Outros non paran de da-la tabarra coa República Galega no seu muro de Facebook, pois outros exercen o seu dereito a Retranca con normalidade e na rúa, sen medo á vergoña.

Mirador do Monte Ancos, a 3 de Xullo do 2.014.

Gabriel Arcángel de Dios. Profesor universitario de Derecho Internacional en la Universidad de ACME (Acme; West Virginia; USA).