Contas de leiteiras

CHANCHONADA  4º

Contas de leiteiras

           Hai dúas cousas que sabe facer moi ben o noso querido Sr. Miguel Español, unha é beber albariño e outra ó mesmo tempo mitinear sobre o ben que gobernan, o ben que administran o Concello,... Nun principio concedimoslle a razón da dúbida, pero hoxe coa documentación que me está a chegar, xa non lle podo nin quero seguir escoitando as súas parvadas. Aquí lle digo que cando queira fachendear do ben que goberna, o faga con papeis do Concello e poñendo as cousas en negro sobre branco.

            Xa estamos perto do final deste ano, resulta que o ano pasado 2.011 as contas do Concello da Guarda pecharon cunhas perdas de  363.875,21€; este dato deixa en evidencia toda a mitinada barata que o noso protagonista gosta de soltar polos bares e lugares similares. Os nosos veciños deben entender que cada ano que o Concello perde diñeiro, iso supón que aumenta a nosa débeda cós Bancos; a estes o Concello xa lles debe  1.117.806,46€. Imos con outro exemplo da mala xestión económica do goberno municipal da Guarda, mentras moitos veciños cumpren puntualmente cós seus impostos, hai quen non o fai, e o pior é que o Concello non fai todo o posible para asegura-lo cobro desas débedas e impostos; así temos un saldo de  2.016.793,79€ de dúbidoso cobro. Non fai falla ser moi intelixente para ver que se aseguramos o cobro de pouco máis da metade deste saldo, poderíamos paga-las débedas cós Bancos.

            Mire Sr. Miguel Español, a ventaxa que ten o seu goberno municipal é que enfrente o concelleiro do BNG non sabe de contas, nin de números,... (como así recoñeceu no pleno do 29 de Xullo do 2.011); tamén a “lideresa” do PP leva dito varias veces que de contas non entende. ¡¡Cunha oposición así calqueira tontada é creible!! Para min as contas das leiteiras son só para os contos dos nenos, i eu xa non creo en contos, e moito menos cando o conta un político.

            ¿Hai algo máis perigoso que dous empregados do concello discutindo en público?; sí un cidadán que pon as orellas en alerta para escoitar. Hoxe dunha instalación municipal saía un camión dunha empresa privada cargado de chatarra ou sucata; con esta visión surxirónme preguntas, busquei respostas nos despachos ofiaciais, pero só topei o tópico “silencio administrativo”.

            ¿Hai algún contrato escrito entre esta empresa privada e o Concello para venderlle a chatarra?, ¿hai outros similares para o cartón, vidro, plástico,...?

            ¿Canto ingresa por este concepto o Concello?, ¿en qué partida o fai constar?, ¿queda constancia escrita da cantidade carrexada e do diñeiro ingresado?

            Seguro que o Sr. Miguel Español me dirá que coa boa xestión do goberno municipal que fan, si hai contratos, controlanse as cantidades carrexadas, estas empresas pagan puntualmente todo o material que levan,... Claro que ainda teño outra dúbida, ¿entón porqué descutian dous empregados municipais como face-lo reparto deste diñeiro cobrado pola carrexada?, un opinaba que debía de ser para unha comida do persoal municipal, outro opinaba dun reparto en metálico entre o persoal que traballa nas rúas,... ¡¡¿Qué está acontecer aquí?!!

            Non quero pensar mal, pero non poido evitalo; pero teña certas sospeitas que mentras alguen adicase a trasegar albariño dunha botella ó seu bandullo, outros están xogando con cousas pringosas que manchan as mans. Eu deixo ahí a pregunta, logo veremos que acontece, ¿non será isto outro morto debaixo da alfombra como o impago da Estación Marítima?.

Mirador do Monte Ancos, a 10 de Decembro do 2.012

Francisco Lorín Colorado