Pratos rotos

CHANCHONADA  528º

Pratos rotos.

Queridos lectores, despois da xornada electoral de onte, agora é o momento de facer algunhas reflexións dende a perspectiva local.

1º)  No ano 2.014 xa falamos aquí do “Club dos 1.600”, para referir a aquel conxunto de cidadáns da Guarda que non tiñan lealtade electoral ás tres opcións electorais que representan o PP, PSOE e BNG, que buscaban outras opcións electorais. Este grupo electoral tamén tiñan os seus semellantes nos concellos veciños. Foi nas eleccións locais do ano 2.015 cando agromou con visibilidade este grupo social, especialmente en Tui, A Guarda e Oia. Hoxe seguen plenamente activos apoiando a outras alternativas electorais.

En Oia oscilan entre os 480 a 570 votantes; na Guarda oscilan entre os 1.940 a 2.240 votantes; no Rosal están entre 1.100 a 1.270 votantes; en Tomiño o grupo representa de 2.080 a 2.520 votantes e finalmente en Tui o grupo oscila de 2.880 a 3.370 votantes.

2º)  O PP do Baixo Miño resiste ben o envite electoral, aínda que non de igual maneira; onde amosa un mellor comportamento é en Oia, A Guarda e Tui; no Rosal a melloría é moi pequena; soamente en Tomiño amosa sinais negativas. De feito en Tomiño respecto ós datos do ano 2.011 é onde amosa a maior perda de votantes (40%), mentres que na Guarda é onde se rexistra a maior fidelidade (perda dun 24% respecto ó ano 2.011).

Os dirixentes do PP en Tomiño teñen moito traballo que facer, sobre todo de cara ó vindeiro outono.

3º) No PSOE miñoto hai un pouco de todo; na Guarda, Rosal e Tui logran para-los descensos, pero en Oia e Tomiño aínda seguen a perder votos.

Outra sinal que debería de preocupar no PSOE miñoto é que hoxe son a actual 3º opción electoral no Baixo Miño nas eleccións xerais,... ¿qué acontecerá no vindeiro outono?. A situación na Guarda é mala, pois hai unha distancia de 500 votos respecto á segunda opción electoral. En Oia acaban de marcan mínimos electorais,...

4º) A pior situación electoral é para o BNG, con estes resultados volta a niveis de 1.984; pasa a ser a 5º opción electoral en tódolos concellos; nin en Tomiño onde ostentan o goberno municipal son capaces de resistir e manter unha posición digna. ¡¡Que non se enganen cós resultados das municipais do 2.015!!

Respecto ós resultados das xerais do ano 2.011, na Guarda levan perdido o 62%, no Rosal o 64%, en Oia o 68%; en Tomiño o 73% e en Tui o 76% dos votantes. ¿¿Non haberá que facer unha reflexión interna e deixar de chimpar culpas a outros??. Tanto presumir do goberno municipal de Sandra en Tomiño, e logo resulta que en Tomiño é un dos lugares onde o BNG perde máis votos.

Posiblemente de seguir por este camiño, en anos vindeiros o BNG desapareza do mapa electoral de Oia. De seguir por este camiño, posiblemente no vindeiro outono o BNG fique sen grupo no Parlamento de Galicia, con poucos ingresos económicos é unhas importantes débedas ás que non poderá facer fronte.

No chan están os restos do pratos rotos; pódense recoller e pegalos trozos para tentar recompoñe-los pratos,... ou deixa-la ciscallada no chan e comer en pratos de papel. ¿¿Qué pensan face-los dirixentes locais??; o outono está moi perto.

Mirador do Monte Ancos, a 27  de Xuño do 2.016.

Toribio  Verdugo de Dios.  Doctor en Teología, Universidad Pontificia de Hijos de  Dios (La Hija de Dios; Ávila; España).