Administracións mal preparadas

CHANCHONADA  521º

Administracións mal preparadas.

O pasado venres 2 de Outubro do 2.105 foi publicada no BOE a Lei 39/2.015 do Procedemento Administrativo Común das Administracións Públicas; que dispón na súa Disposición Final 7ª que a citada Lei entrará totalmente en vigor o vindeiro 2 de Outubro do presente ano 2.016. Polo tanto faltan pouco máis de 4 meses para esa data de entrada en vigor. ¿Foron formados os funcionarios municipais sobre a nova normativa legal?; ¿están informados e formados os concelleiros das Corporacións nesta nova normativa legal?; ¿están preparados os nosos Concellos para esta nova normativa legal?.

Posiblemente a resposta sexa única para estas preguntas: ¡¡¡NON!!!.

Fica moi lonxe aquela primeira Lei de Procedemento Administrativo, coñecida como a “Lei Azcárate” de 1.889. Moitas cousas levan trocado na nosa sociedade dende a Lei 30/1.992, que aínda está en vigor. Imos tratar de expoñer algunhas das novidades legais que introduce esta nova Lei 39/2.015.

Como prologo, diremos que existe a Lei 11/2.007 que regula o acceso electrónico dos cidadáns ós servicios públicos, que fai legal o procedemento electrónico para relacionarse o cidadán coa Administración, así como a obriga da Administración de dotarse de medios e os sistemas para que ese dereito poida ser exercido. Pero a realidade dos nosos concellos é a contraria, aínda que o cidadán queira, a inmensa maioría dos portais e páxinas oficiais dos concellos en internet non están preparados para facer trámites administrativos. Nestes 9 anos os concellos levan feito moi pouco, ou nada, para adaptarse á legalidade vixente.

De feito a norma habitual é que a inmensa maioría das páxinas oficiais en internet dos concellos só serve para ollar unha información intranscendente, olla-la foto do titular da Alcaldía, ollar unhas fotos turísticas do concello, coñece-lo calendario de festas locais,... e pouco máis. En conclusión, a maioría das páxinas oficiais en internet dos concellos non valen para nada, son inútiles e non serven como medio de acceso para realizar trámites administrativos entre o cidadán e o Concello.

Novidades da nova Lei 39/2.015:

1º)  As notificacións electrónicas serán preferentes; dirixiranse á sede electrónica ou enderezo electrónico habilitada polo cidadáns; tamén se lle enviará avisos de notificacións a determinados dispositivos habilitados (tabletas, móbiles,...).

2º)  Punto de Acceso Xeral Electrónico de cada Administración, o cal funcionará como si fose unha oficiña física de Rexistro Xeral que ten cada Administración.

3º) Mantéñense as actuais figuras de recursos administrativos: Alzada, potestativo de Reposición e extraordinario de Revisión. Pero hai que destacar, cando interponse un recurso por vía xudicial contra unha resolución administrativa; o órgano administrativo poderá suspende-la eficacia do acto administrativo ata que recaia unha sentencia ou resolución xudicial.

4º)  No seu artigo 24º, 1 naqueles procedementos administrativos iniciados a solicitude do interesado, sen perxuizo da resolución que a Administración debe de dictar, ó vencemento do prazo máximo de dictar resolución sen emitir unha resolución expresa, lexitima ós interesados para entender estimada a súa petición. (Silencio administrativo positivo).

O silencio en actos que deben resolver recursos, impugnacións,... é desestimatorio. (silencio administrativo negativo).

5º)  No seu artigo 30º. Prazos no procedemento administrativo.

A)    Son hábiles tódalas horas do día, que forman parte dunha día hábil.

B)     Son días hábiles tódolos días excepto os Sábados, Domingos e festivos. (Na actual normativa de procedemento o Sábado é día hábil).

C)    Será día inhábil en todo caso: cando non hai concordancia de día hábil ou inhábil entre a sede da Administración e o lugar de residencia do cidadán. A non concordancia supón sempre un día inhábil; para que sexa día hábil ten que ser día hábil na sede administrativa e no lugar de residencia do cidadán.

6º)  O funcionamento do Rexistro electrónico:

A)    Debe ser operativo tódolos días do ano, durante as 24 horas.

B)     A presentación dun documento nun día hábil, será rexistrado como no primeiro día hábil seguinte a esa data.

Sexamos sinceiros, a inmensa maioría dos nosos concellos no están preparados para isto da Administración electrónica, carecen de medios materiais, de técnicos, de persoal preparado,... Para afrontar isto teñen dúas solucións:

A)      Facer uso da Disposición Adicional 2º da Lei 39/2.015; de adherirse ó rexistro electrónico da AXE (Administración Xeral do Estado).

B)      Xuntarse varios concellos, para dotarse de medios materiais, técnicos e profesionais para a posta en marcha do servicio de Administración Electrónica e compartilo.

¿Que acontecerá?. Cabe a opción que sempre toman os inútiles: non sei, non me consta, estamos estudiando o tema, temos solicitado uns informes sobre o mesmo,... Ou sexa, emitir desculpas valeiras de contido para non facer nada. Posiblemente as nosas administracións locais fagan honra ó título deste artigo.

Mirador do Monte Ancos, a 23  de Maio do 2.016.

Pedro Pablo Campos Ancos.  Creativo publiciatario, Socidad Publicitaria “La Propaganda” (Santa Tecla; Departamento de la Libertad; El Salvador).